Apia - Sydney

Jæja, kominn tími til að yfirgefa eyjuna grænu og skjótast fram yfir daglinuna svona til að toppa allt rugl í líkamsklukkunni. Strákarnir okkar áttu daginn alveg, höfðu keypt sér pils fyrir flugið og voru hinir flottustu í klæðum innfæddra. Farþegarnir voru líka hæstánægðir að ÖLL áhöfnin væri uppáklædd í tilefni dagsins. Flugtíminn til Sydney var 5:35 og var boðið upp á kokteilinn ,,Love is in the air” (því við vorum ekki í loftinu á Valentínusardaginn) þegar við renndum yfir daglínuna. Mikið fjör um borð og er bridge-klúbburinn orðinn fastur punktur í setustofu vélarinnar. -- Lentum kl 13.25 að staðartíma en það er nú voða skrítið að missa svona heilan sólarhring úr. Tollgæslan í Sydney ákvað að við áhöfnin og hver einasta taska í lestum vélarinnar skyldi gegnumlýst og endaði ævintýrið með 1 ½ klst gönguferð um alþjóðaflugvöllinn. Gonsi þurfti að hósta upp 5 þúsund dollurum fyrir farþega sem hafði ekki alla pappírana sína í lagi og dönsuðum við í gegn um NOKKRAR gegnumlýsingar í viðbót og brostum bara hringinn - þó hugur fylgdi nú ekki verki! Björg gekk m.a.s. um og gaf öllum róandi blómadropa undir tunguna. Komumst loks upp á hótel Grace 5 klst eftir lendingu og var hópeflisæfing inni hjá Önnu Dís áður en við röltum niður í bæ í kvöldverð. Vorum frekar framlág og flengdum koddann snemma. -- Við innritunarborðið á Samoa: Oddný:,,Hvort er þetta karl eða kona?” Jói L.:,,Hann er örugglega í miðju breytingarferlinu …!!”

Athugasemdir

[Steinunn Ragnarsdóttir (IP-tala skráð) 19.2.2008 kl. 13:53]

Hólímólí,

hrikalega held ég að það sé gaman hjá ykkur. Finn hvergi myndir af strákunum í fjöðrum.....er svo sem ekki tölvuglögg?

Góða skemmtun.

Bestu kveðjur,

Steinunn Ragnarsdóttir 

[Sigrún Jónsdóttir (IP-tala skráð) 20.2.2008 kl. 10:00]

Daginn!

Ég held að þeir séu í nýja uniforminu á myndin hérna fyrir ofan! Loftar vel um þá ekki satt?

Bkv.Sigrún

p.s. FFÍ samþykkti ábyrgðina sem við fengum frá VISA Valitor fyrir ykkar hönd :)