Dagur á Samoa

Allir frekar áttavilltir í kollinum sökum tímamismunar og voru vaknaðir fyrir allar aldir enda haninn í okkar hverfi vitlaust stilltur. Morgunverður á Aggie Grey´s hótelinu, sem var bæði griða- og GREIÐAstaður hér á árum áður, rann ljúft niður og síðan var lagt af stað í skoðunarferð með honum Sisilo sem ók okkur þegjandi og hljóðalaust um eyjuna. (YES!) Engin Beatrice þar á ferð! Óskar, Siggi og Halli urðu að fara út á völl að leita að tösku eins farþega sem týndist og í framhaldi af því fóru ,,Siggi & Hall” í eldhúsið að undirbúa matinn fyrir næsta legg. Þar áttu þeir sér fótum fjör að launa fyrir ágangi karlmanna sem vildu gjarna kynnast þeim miklu miklu betur. Eyjan Upalu sem Apia er á er skógi vaxin og fagurgræn eins og reyndar allar eyjarnar í Samoa-eyjaklasanum. Við ókum með nokkrum KODAK-stoppum á Lalomanu ströndina á suðausturhluta eyjarinnar og tókum busl í túrkisgrænum sjónum og eina netta neðansjávarmyndatöku a la Gonsi. Skoðuðum fossa og fagrar strendur og fengum að fara inn á sveitaheimili – opið hús – eins og þau eru öll hér á Samoa. Húsin eru þakið eitt á stöplum og heimilislífið (!) einungis hulið með örþunnum gardínum. Stutt er að fara og setja ljós á leiði látinna ástvina því í hverjum garði eru grafreitir hlaðnir blómum og skrauti Vorum alveg að verða bílveik þegar við renndum síðdegis inn í Apia og að sjálfsögðu beint á markaðinn til fatakaupa fyrir næsta legg. Hvíldum lúin bein við laugina þar til sólin settist, dinnerinn var innanhúss sökum syfju. Brottför snemma í fyrramálið. The Globetrotters bjóða góða nótt.

Athugasemdir

[Lapas sys (IP-tala skráð) 17.2.2008 kl. 21:35]

Hefði seint trúað því að þú ættir eftir að birtast á mynd í PILSI. Allt er í heiminum hverfult. Er samt ekki vissu um að ég sýni jóa júníor myndirnar gæti truflað verulega unga sál að sjá idolið sitt í kvenmannsklæðum. Prinsessan þín hraut eins og steinn hjá okkur í alla nótt og vaknaði hress og fór að útbúa morgunmat með frænda sínum. Stússuðust heillengi og við höfðum mikið fyrir því að halda niður í okkur hlátrinum að hlusta á samræðurnar þegar þau voru að útbúa morgunmatinn. Þau voru eins og áttræð hjón, svo samtaka í öllu saman. Við erum svo á leiðinni til NY á morgun og verðum þar í jafnvel verra veðri en hér fram á fös. Er alveg að renna á rassinn með hundinn en læt ykkur fylgjast með framhaldinu...

Ætla ekki einu sinni að segja ykkur að hafa gaman að, sé það á myndunum að þið þurfið enga hvatningu við það :)

Logandi kveðjur úr landinu